كلمة لحباب

موضوع: كلمة لحباب الأحد مايو 23, 2010 7:44 pm

كلمة لحباب

يالي سالتني علاش كلمة لحباب ماعدناش نقراوها فلمسيد وش من سبة
علاش عدنا نقراو غير لحساب سمعت بلي بكري كانو يقراو عالصحبة
راني حاب نعرف محلها من الاعراب المشكل فالفعل ولا الفاعل إلي تخبى
إيلا كان الفعل منصوب نرفعو النصاب والله هاذ القرايا ما فهمت فيها حبة
علاش الحبيب اليوم عاد ما ينصاب وكرهنا بعضانا وعلاش يا عجابة
ولا الصحبة حبست فعصر ابن الخطاب ابا بكر وعثمان وعلي والصحابة
علاش عدنا نقراو عالنجوم وعالسحاب بصح ما نقراوش علبنادم كيف يتربى
لله خويا فيصل احكيلي علحباب ما عدناش نقراوها فلمسيد وش من سبة
ايلا قلتلك نعرف نتسمى كذاب على خاطر كاين شحال من سبة وسبة
بصح راح نحاول نردلك جواب وانا هاذ لجواب خديتو من تجربة
كنت انا عايش في وقت شباب ربي سبحانو عطاني حاجة شابة
نعاون الناس في لوقات الصعاب وكان الي يقصدني نقولو مرحبة
في وجههم عمري ما نغلق الباب ولتم بالذات بديت نعرف الصحبة
الناس يحبوني وكثرو لحباب صبح وعشية معاهم في رحبة
كي نجي نحسبهم يتلفلي لحساب منين طاحت عليا كامل هاذ لمحبة
كنت وين نروح نلقاهم قراب حتى ساعات وليت غير نتخبى
نقعد وحدي أو نغلق الباب وفلت واقيل أنا سلطان الغابة
حسيت براسي راني شايد السحاب وخفت لا كان نموت أو يبنولي قبة
ونولي والي مدفون تحت التراب والناس تدعيني وتستنى الإجابة
كيما راهم يديرو اليوم فلقباب نشاء الله يهديهم بالمناسبة
المهم مادامش ذاك الوقت الشباب وما نعرف كيفاه جاتني واحد الضربة
تنقطع الرزق وتغلقوا لبواب حمدت الله ورضيت بالكاتبة
وبدات الدنيا عليا تصعاب وبدى حتى الوقت يدورهالي غربة
وبداوي جوا يسقسو عليا الصحاب ما راكش تبان واش هاذ الغيبة؟
قلتلهم ماعليش المومن مصاب والدنيا مرة ساهلة ومرات صعيبة
والرزق حاجة محطوطة في كتاب ساعات تبان وساعات تتخبى
كيف ذيك الشمس الي يغطيها السحاب تعاود تبان لما تفوت السحابة
المهم دركا البركة فالصحاب إلي كانوا صابوني في لوقات الصعيبة
نروح ليهم ونقصدهم للباب يوقفوا معايا في هاذ المصيبة
بصح هاذ المرة رام طولوا لغياب ماحوسوش عليا يادرا واش من سبة ؟
ما علي شانا نروح ونسبب لسباب يالوكان نسمع منهم كلمة شابة
ينسوني شويا في هاذ العذاب راني غير وحدي عايش في غربة
الي نروح ليه نقصدو للباب أما ماكاشو ولا يصيبلي سبة
وبديت نشوف بلي كثرو لسباب ولتم عرفت بلي راهو عليا يتخبى
وعرفت بلي كنت غالط فلحساب وبلي ماشي أنا سلطان الغابة
ولا بلاك أنا ..ودركا راسي شاب؟ والسبع كي يكبر يدوروا عليه الذيابة
لتما بالذات إلي عرفت الصواب وعرفت وقتاش تزيد الصحبة
الصحبة ما تزيدش فالوقت الشباب تزيد في لوقات والظروف الصعبة
صبرت مع الوقت حتى ربي جاب صاحب من جيهة ما كانتش محسوبة
قالي أنا صاحب وماشي طلاب ونقسم معاك كلش حبة بحبة
كيما كان الحال تعاوننا عالصواب توكلنا على الله وتعاشرنا بمحبة
تقاسمنا لفراح وتقاسمنا لعذاب أو سبحان الله ردلنا الإجابة
رجعلنا الخير وفتحلنا لبواب وعلمنا بزاف من ذيك التجربة
وزادوا ولاو لينا هاذوك لحباب إلي كانوا خلاونا في لوقات الصعيبة
قصدونا وعاودنا فتحنالهم الباب وما سمعوا ملعندنا غير الكلمة الشابة
بصح هاذ المرة عدنا نديرو لحساب نمدولهم بصح مانستناوش الإجابة
يا الي سالتني على كلمة لحباب ما نقدر نقولك من غير ربّ
صاحب واحد فالشدة ينصاب والا ميات صاحب فالشدة يتخبى